THE REPUBLIC OF THE UNION OF MYANMAR

MINISTRY OF HEALTH AND SPORTS

DEPARTMENT OF MEDICAL RESEARCH

News in Brief


April 2018 Events


ဌာနတွင်းပညာရပ်ဆိုင်ရာဟောပြောပွဲ ကျင်းပပြုလုပ်ခြင်း

သုတေသနစွမ်းအားမြှင့်တင်ခြင်း(Research Capacity Strengthening) နှင့် ဗဟုသုတ မျှဝေခြင်းအစီ အစဉ်(Knowledge Sharing Program)အရ ပညာရပ်ဆိုင်ရာ ဟောပြောပွဲ အခမ်းအနားကို ဆေးသုတေသန ဦးစီးဌာန (ပြင်ဦးလွင်ရုံးခွဲ) အစည်းအဝေးခန်းမ(၁)တွင် ၂၀၁၈ ခုနှစ် မတ် ၂၂ ရက် မွန်းလွဲ ၁:၀၀ နာရီ၌ ကျင်းပ ပြုလုပ်ခဲ့ပါသည်။ အထက်ပါအခမ်းအနားတွင် ဆေးဝါးဗေဒသုတေသနဌာနခွဲမှ သုတေသနမှူး ဒေါက်တာအိအိထွေးက သဘာပတိ အဖြစ်လည်းကောင်း၊ ဇီဝဆေးပညာစာကြည့်တိုက်ဌာနခွဲမှ စာကြည့်တိုက် လက်ထောက်(၂) ဒေါ်စိုးစိုးခိုင်က အခမ်းအနားမှူးအဖြစ်လည်းကောင်း အသီးသီးဆောင်ရွက်ခဲ့ကြပါသည်။

အဆိုပါဟောပြောပွဲတွင် ဆေးသုတေသနဦးစီးဌာန(ပြင်ဦးလွင်ရုံးခွဲ) ဇီဝဓါတုဗေဒ သုတေသနဌာနခွဲမှ သုတေသနမှူး ဒေါ်လဲ့လဲ့ဝင်းက “Elemental Composition, Phytochemical Screening and Antibacterial Activity of Aegle marmelos (L.) Correa (ဥသျှစ်)”ခေါင်းစဉ်ဖြင့်လည်းကောင်း၊ ရောဂါ ဗေဒသုတေသနဌာနခွဲမှ သုတေသနလက်ထောက်(၂) ဒေါ်စုစုမြိုင်က “Basic Concepts on Laboratory Quality ” ခေါင်းစဉ်ဖြင့်လည်းကောင်း တင်ပြခဲ့ပါသည်။ တက်ရောက်လာသူဝန်ထမ်းများက သိလိုသည်များကို စိတ်ဝင်စားစွာ မေးမြန်းခဲ့ကြပြီး သက်ဆိုင်ရာပညာရှင်များကလည်း ဖြည့်စွက်အကြံပြုဆွေးနွေးခဲ့ကြပါသည်။ ဟောပြောပွဲသို့ ဒုတိယညွှန်ကြားရေးမှူးချုပ် (ငြိမ်း/ကျွမ်းကျင်) ဒေါက်တာခင်လင်းနှင့် ညွှန်ကြားရေးမှူးအဖွဲ့ဝင် များအပါအဝင် ဝန်ထမ်း(၅၆)ဦး တက်ရောက်ခဲ့ကြပါသည်။



Health Poverty Action မှ Myanmar Program Coordinator Ms. Li Jiayin အားလက်ခံတွေ့ဆုံခြင်း

၂၀၁၈ ခုနှစ် ဧပြီ ၃ ရက် မွန်းလွဲ ၁:၁၅ နာရီတွင် ဆေးသုတေသနဦးစီးဌာန ညွှန်ကြားရေးမှူးချုပ် ဒေါက်တာကျော်ဇင်သန့်သည် Health Poverty Action မှ Myanmar Program Coordinator Ms. Li Jiayin အား ဇီဝဆေးပညာသုတေသနအစည်းအဝေးခန်းမ၌ လက်ခံ တွေ့ဆုံခဲ့ပါသည်။ အဆိုပါ တွေ့ဆုံပွဲသို့ ဆေးသုတေသန ဦးစီးဌာနမှ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများ၊ Health Poverty Action မှ National Coordinator ဒေါက်တာအောင်နိုင်ထွန်းတို့ တက်ရောက်ကြ၍ HPA နှင့်ပတ်သက်ပြီး တရုတ်ပြည်သူ့ သမ္မတနိုင်ငံ ပီကင်းတက္ကသိုလ်နှင့် ဆေးသုတေသနဦးစီးဌာနတို့ တွေ့ဆုံဆွေးနွေးရန် အတွက် ကြိုတင်ညှိနှိုင်းဆွေးနွေးတိုင်ပင်ခဲ့ကြပါသည်။ တွေ့ဆုံဆွေးနွေးမှုအပြီးတွင် ညွှန်ကြားရေးမှူးချုပ်နှင့် ဧည့်သည် တော်များအမှတ်တရ စုပေါင်းဓာတ်ပုံရိုက်ကူးခဲ့ကြပါသည်။



ဌာနတွင်းပညာရပ်ဆိုင်ရာဟောပြောပွဲ ကျင်းပပြုလုပ်ခြင်း

သုတေသနစွမ်းအားမြှင့်တင်ခြင်း(Research Capacity Strengthening)နှင့် ဗဟုသုတမျှဝေခြင်းအစီ အစဉ် (Knowledge Sharing Program) အရပညာရပ်ဆိုင်ရာ ဟောပြောပွဲအခမ်းအနားကို ဆေးသုတေသန ဦးစီးဌာန(ပြင်ဦးလွင်ရုံးခွဲ) အစည်းအဝေးခန်းမ(၁)တွင် ၂၀၁၈ ခုနှစ် ဧပြီ ၄ ရက် မွန်းလွဲ ၁:၀၀ နာရီ၌ ကျင်းပ ပြုလုပ်ခဲ့ပါသည်။ အထက်ပါ အခမ်းအနားတွင် ဆေးဝါးဗေဒသုတေသနဌာနခွဲမှ သုတေသနမှူး ဒေါက်တာ အိအိထွေးက သဘာပတိ အဖြစ်လည်းကောင်း၊ ဇီဝဆေးပညာစာကြည့်တိုက်ဌာနခွဲမှ စာကြည့်တိုက်လက်ထောက် (၂) ဒေါ်စိုးစိုးခိုင်က အခမ်းအနားမှူးအဖြစ်လည်းကောင်း အသီးသီး ဆောင်ရွက်ခဲ့ကြပါသည်။

အဆိုပါဟောပြောပွဲတွင် ဆေးသုတေသနဦးစီးဌာန(ပြင်ဦးလွင်ရုံးခွဲ) ဓါတ်ခွဲခန်းတိရစ္ဆာန် မွေးမြူရေးဌာန ခွဲမှ သုတေသနအရာရှိ ဒေါက်တာရတနာအောင်မျိုးဟန် က “အိမ်မွေးတိရစ္ဆာန်များမှ ကူးစက်နိုင်သောရောဂါများ” ခေါင်းစဉ်ဖြင့် လည်းကောင်း၊ ဗိုင်းရပ်စ်ဗေဒ သုတေသနဌာနခွဲမှ သုတေသနလက်ထောက်(၂) ဒေါ်ယဉ်ယဉ်ခိုင်က “Techniques for Examination of Stool”ခေါင်းစဉ်ဖြင့်လည်းကောင်း တင်ပြခဲ့ကြရာ တက်ရောက်လာသူ ဝန်ထမ်းများက သိလိုသည်များကို စိတ်ဝင်စားစွာမေးမြန်းခဲ့ကြပြီး သက်ဆိုင်ရာ ပညာရှင်များကလည်း ဖြည့်စွက် အကြံပြု ဆွေးနွေးခဲ့ကြပါသည်။ အထက်ပါဟောပြောပွဲသို့ ဒုတိယညွှန်ကြားရေးမှူးချုပ် (ငြိမ်း/ကျွမ်းကျင်) ဒေါက်တာခင်လင်းနှင့် ညွှန်ကြားရေးမှူး အဖွဲ့ဝင်များအပါအဝင် ဝန်ထမ်း(၈၃)ဦး တက် ရောက်ခဲ့ကြပါသည်။



Research and Development Technical Strategy Group အစည်းအဝေးကျင်းပခြင်း

၂၀၁၈ ခုနှစ် ဧပြီ ၄ ရက် မွန်းလွဲ ၂:၀၀ နာရီတွင် Three Millennium Development Goal (3MDG) ရန်ပုံငွေအဖွဲ့မှ ပူးပေါင်းစီစဉ်သော Research and Development Technical and Strategy Group၏ ဒုတိယ အကြိမ်အစည်းအဝေးကို ဇီဝဆေးပညာ သုတေသန အစည်းအဝေးခန်းမ၌ ကျင်းပပြုလုပ်ရာ ဆေးသုတေ သနဦးစီးဌာန ညွှန်ကြားရေးမှူးချုပ် ဒေါက်တာကျော်ဇင်သန့် တက်ရောက်၍ သဘာပတိအဖြစ် ဆောင်ရွက်ပြီး အဖွင့်အမှာစကား ပြောကြားပါသည်။ အဆိုပါ အစည်းအဝေးသို့ ကျန်းမာရေးနှင့်အားကစားဝန်ကြီးဌာန လက်အောက်ရှိ ဆေးသုတေသနဦးစီးဌာန၊ ပြည်သူ့ကျန်းမာရေး ဦးစီးဌာန၊ ကုသရေးဦးစီးဌာနတို့မှတာဝန်ရှိသူများ၊ WHO ဌာနေကိုယ်စားလှယ်ရုံးမှ တာဝန်ရှိသူများ၊ (3MDG) ရန်ပုံငွေအဖွဲ့မှ Monitoring & Evaluation Officer, Gulshod Allabergenova နှင့် အစိုးရမဟုတ်သောအဖွဲ့အစည်းများမှ ကိုယ်စားလှယ်များ တက် ရောက်ကြပါသည်။ ရှေးဦးစွာ ဆေးသုတေသနဦးစီးဌာနမှ ညွှန်ကြားရေးမှူး (အထွေထွေစီမံခန့်ခွဲရေး) ဒေါက်တာတင်ဦးက National Health Research Policy Guidelines(2018) ကိုဖတ်ကြားတင်ပြပါသည်။ ထို့နောက် တက်ရောက်လာသူများက Coordination, Planning, Implementation and Dissemination of Health Research in Myanmar၊ Linkages between Research and Policy-making, Programme Planning and Implementation၊ NHP 2017-2021 Implementation တို့နှင့် ပတ်သက်၍ အကြောင်းအရာ အချက်အလက်အစုံအလင်ကို ဆက်စပ်ခြုံငုံသုံးသပ် ဆွေးနွေးအကြံပြုခဲ့ကြပါသည်။


ထိုင်းနိုင်ငံ Khon Kaen University မှ Prof. Pisake Lumbiganon နှင့်အဖွဲ့အားလက်ခံတွေ့ဆုံခြင်း

၂၀၁၈ ခုနှစ် ဧပြီ ၆ ရက် မွန်းလွဲ ၂:၀၀ နာရီတွင် ဆေးသုတေသနဦးစီးဌာန ညွှန်ကြားရေးမှူးချုပ် ဒေါက်တာကျော်ဇင်သန့်သည် ထိုင်းနိုင်ငံ Khon Kaen University မှ Prof. Pisake Lumbiganon, President, Royal Thai College of Obstetricians and Gynaecologists ဦးဆောင်သောအဖွဲ့အား ဇီဝဆေးပညာသုတေသနအစည်းအဝေးခန်းမ၌ လက်ခံတွေ့ဆုံခဲ့ပါသည်။ ထိုသို့တွေ့ဆုံရာတွင် ဆေးသုတေသနဦးစီး ဌာနမှ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများ၊ သက်ဆိုင်ရာသုတေသီများနှင့် ကမ္ဘာ့ကျန်းမာ ရေးအဖွဲ့ မြန်မာနိုင်ငံဌာနေကိုယ်စားလှယ်ရုံးမှ Technical Officer (HIV/AIDS) Ms. Phavady Bollen တို့လည်း တက်ရောက်ကြ၍ WHO Long Term Institutional Development HUB အစီအစဉ်ဖြင့် ကျင်းပပြုလုပ်မည့် Workshop in Systematic Review and Advanced Literature Search၊ Workshop in Implementation Research နှင့် International Short Course Training Research Methodology and Biostatistics တို့နှင့် ပတ်သက်၍ဆွေးနွေးညှိနှိုင်းခဲ့ကြပါသည်။

(၂၆) ကြိမ်မြောက် ဒုလ္လဘရဟန်းခံ၊ သီလရှင်ဝတ်အလှူတော်မင်္ဂလာကျင်းပခြင်း

ဆေးသုတေသနဦးစီးဌာန၏ (၂၆) ကြိမ်မြောက် ဒုလ္လဘရဟန်းခံသီလရှင်ဝတ် အလှူတော်မင်္ဂလာအခမ်းအနားကို ၂၀၁၈ ခုနှစ် ဧပြီ ၁၁ ရက် (ဗုဒ္ဓဟူးနေ့) တွင်ကျင်းပခဲ့ပါသည်။ ရှေးဦးစွာ ဒုလ္လဘရဟန်းလောင်း (၁၀) ပါးအား နံနက် ၆:၀၀ နာရီတွင် ဆံချ၊ သင်္ကန်းတောင်း၍ ရှင်သာမဏေပြုပေးပြီးနောက် နံနက် ၈:၀၀ နာရီ တွင် ရွှေတိဂုံဘုရားတောင်ဘက် ရဟန္တာသိမ်တော်ကြီး၌ မူလမင်းကွန်းဆရာတော် ဦးဝိလာသအားအမှူးထား၍ အဂ္ဂမဟာဂန္ထဝါစကပဏ္ဍိတ ဆရာတော်ဦးသုမန(ပါမောက္ခ) နိုင်ငံတော်ပရိယတ္တိသာသနာ့တက္ကသိုလ် ကမ္ဘာအေး နှင့် သံဃာတော်များက ဥပသမ္ဗဒကံဆောင်ရဟန်းဘောင်သို့ သွတ်သွင်း ချီးမြှင့်ပေးတော်မူပါသည်။ ထို့နောက် နံနက် ၉:၃၀ နာရီတွင် ဆေးသုတေသနဦးစီးဌာန ဒုတိယညွှန်ကြားရေးမှူးချုပ်(သုတေသန) ဒေါက်တာလှိုင်မြတ် သူ အမှူးပြု၍ အရာထမ်း၊ အမှုထမ်းမိသားစုများက သံဃာတော်များအား သိမ်ဆင်းလောင်းလှူခဲ့ကြပါသည်။

ထို့နောက် နံနက် ၁၀:၀၀ နာရီတွင် ဆေးသုတေသနဦးစီးဌာန ဗဟိုဇီဝဆေးပညာ စာကြည့်တိုက် အစည်းအဝေးခန်းမ၌ ရေစက်ချတရားတော်နာ အခမ်းအနားကိုကျင်းပရာ ရန်ကုန်မြို့၊ ရွှေတိဂုံစေတီတော် မူလ မင်းကွန်းကျောင်းတိုက်မှ ပဓာနနာယကဆရာတော်နှင့် ပင့်သံဃာတော်များ၊ ဒုလ္လဘရဟန်းများနှင့် သီလရှင်များ ကြွရောက်တော်မူကြပြီး ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများ၊ အရာထမ်း/အမှုထမ်းများ၊ (အငြိမ်းစား) ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများ၊ ဝန်ထမ်းများ စုံညီစွာ တက်ရောက် ကြည်ညိုကြပါသည်။

ရှေးဦးစွာ ဆရာတော်၊ သံဃာတော်များနှင့် ဧည့်ပရိသတ်များက “နမောတဿ” သုံးကြိမ်ရွတ်ဆို ဘုရား ကန်တော့၍ အခမ်းအနားကိုဖွင့်လှစ်ပြီးနောက် အဂ္ဂမဟာဂန္ထဝါစကပဏ္ဍိတ ဆရာတော်ဦးသုမန(ပါမောက္ခ)၊ နိုင်ငံတော်ပရိယတ္တိသာသနာ့တက္ကသိုလ်၊ ကမ္ဘာအေးထံမှ ငါးပါးသီလခံယူဆောက်တည်ကြပြီး ဆရာတော်၊ သံဃာတော်များက အန္တရာယ်ကင်း ပရိတ်တရားတော်များ ရွတ်ပွားသရဇ္စျာယ်တော်မူကြပါသည်။ ထို့နောက် ဆေးသုတေသနဦးစီးဌာန ညွှန်ကြားရေးမှူးချုပ်နှင့် ဝန်ထမ်းများ၏လှူဖွယ်ပစ္စည်းကို ညွှန်ကြားရေးမှူးချုပ် ကိုယ်စား ဒုတိယညွှန်ကြားရေးမှူးချုပ် (သုတေသန) ဒေါက်တာလှိုင်မြတ်သူက လည်းကောင်း၊ ညွှန်ကြားရေးမှူးချုပ် ဒေါက်တာကျော်ဇင်သန့်နှင့်ဇနီးဒေါက်တာသန္တာလဲ့မိသားစု၏ လှူဖွယ် ပစ္စည်းကို ဒုတိယညွှန်ကြားရေးမှူး ချုပ်(သုတေသန) ဒေါက်တာခင်စောအေးက လည်းကောင်း ဆက်ကပ်၍ ကြွရောက်လာကြသော ဧည့်ပရိသတ်များ က သင်္ကန်းအစရှိသော လှူဖွယ်ပစ္စည်းများကို ကိုယ်တိုင်ကိုယ်ကျ ဆက်ကပ်လှူဒါန်းကြပါသည်။ ဆက်လက်၍ ဒုတိယညွှန်ကြားရေးမှူးချုပ် (စီမံ/ဘဏ္ဍာ) ဒေါက်တာဇော်မြင့်က ဆရာတော်၊ သံဃာတော်များထံ နဝကမ္မ အလှူ တော်ငွေများ ဆက်ကပ်လှူဒါန်းရာ ကပ္ပိယကာရကအဖြစ် ဒုတိယညွှန်ကြားရေးမှူး/ဌာနခွဲမှူး (ရောဂါဗေဒ) ဒေါက်တာကျော်စိုးက လက်ခံရယူပါသည်။ ထို့နောက် ဆရာတော်ဦးသုမနက အနုမောဒနာတရား ချီးမြှင့် ဟောကြားတော်မူပြီး ဧည့်ပရိသတ်များက လှူဒါန်းမှုအစုစုတို့အတွက် ရေစက်သွန်းချ အမျှပေးဝေကြပါသည်။ ယင်းနောက် အခမ်းအနားအောင်မြင်ခြင်း အထိမ်းအမှတ် အဖြစ် ဒုတိယညွှန်ကြားရေးမှူးချုပ်(သုတေသန) ဒေါက်တာ ခင်စောအေးက ရွှေမိုးငွေမိုးကြဲပက်ဖျန်းကာ ဧည့်ပရိသတ်များက “ဗုဒ္ဓသာသနံစိရံတိဌတု” သုံးကြိမ်ရွတ်ဆို၍ အခမ်းအနားကို အောင်မြင်စွာ ရုပ်သိမ်းလိုက်ပါသည်။ အခမ်းအနားအပြီးတွင် သံဃာတော်များနှင့် သီလရှင်များအား ဝန်ထမ်းများက နေ့ဆွမ်းဆက်ကပ်လှူဒါန်းကြပါသည်။ အဆိုပါအခမ်းအနားသို့ ဒုတိယညွှန်ကြားရေးမှူးချုပ် (သုတေသန) ဒေါက်တာလှိုင်မြတ်သူနှင့် အရာထမ်း/အမှုထမ်းများ စုံညီစွာတက် ရောက်ခဲ့ကြပြီး ဝန်ထမ်း များနှင့် ဧည့်သည်တော်များအား နေ့လယ်စာဒံပေါက်ဖြင့် ဧည့်ခံကျွေးမွေးခဲ့ပါသည်။

ယခုကျင်းပသောအခမ်းအနားတွင် ဒေါက်တာမောင်မောင်မြ၊ ဦးခင်မောင်အုန်း၊ ဦးအေးသာ၊ ဦးကျော်မင်း ဦး၊ ဦးဆင့်သန်း၊ ဦးစောဘသန်း၊ ဦးထွန်းဝေ၊ ဦးတင်ဌေး၊ ဦးကျော်နိုင်ဝင်း၊ ဦးစံလွင်တို့အား ဥပသမ္ဗဒကံဆောင် ရဟန်းဘောင်သို့ သွတ်သွင်းချီးမြှင့်၍ ဒေါ်နှင်းနုထွေး၊ ဒေါ်အေးအေးမူ၊ ဒေါ်လှလှဝင်း၊ ဒေါ်ကြည်ကြည်ထွေး၊ ဒေါ်မြတ်မြတ်မိုး၊ ဒေါ်အိအိဖြူတို့အား သမိဒ္ဓေါဒယသုခိတာ ရာမမြန်အောင်သီလရှင်စာသင်တိုက်တွင် သီလရှင် အဖြစ် ချီးမြှင့် ပေးနိုင်ခဲ့ပါသည်။


ဆေးသုတေသနဦးစီးဌာန (ပြင်ဦးလွင်ရုံးခွဲ) တတိယအကြိမ် ဒုလ္လဘရဟန်းခံ၊ သီလရှင်ဝတ် အလှူတော်မင်္ဂလာ အခမ်းအနားကျင်းပပြုလုပ်ခြင်း

၂၀၁၈ ခုနှစ် ဧပြီ ၁၁ ရက် နံနက် ၉:၀၀ နာရီတွင် တတိယအကြိမ် ဒုလ္လဘရဟန်းခံ၊ သီလရှင်ဝတ် အလှူတော် မင်္ဂလာအခမ်းအနားကို ဆေးသုတေသနဦးစီးဌာန (ပြင်ဦးလွင်ရုံးခွဲ) အစည်းအဝေးခန်းမ(၁) ၌ ကျင်းပပြု လုပ်ခဲ့ရာ ပြင်ဦးလွင်မြို့နယ်၊ အောင်ကံသာဓမ္မရိပ်သာ ဆရာတော်ဦးရေဝတအမှူးပြု၍ ပြင်ဦးလွင်ရုံးခွဲမှ ဒုလ္လဘ ရဟန်း(၁၁)ပါး၊ သီလရှင် (၆)ပါးတို့ ကြွရောက်ချီးမြှင့်ခဲ့ပါသည်။

ရှေးဦးစွာ အခမ်းအနားကို “နမောတဿ ”သုံးကြိမ်ရွတ်ဆို၍ ဖွင့်လှစ်ခဲ့ပါသည်။ ဆက်လက်၍ ဝန်ထမ်း များက ငါးပါးသီလခံယူဆောက်တည်ခြင်း၊ သံဃာတော်များက ပရိတ်တရားတော်များ ရွတ်ဖတ်ချီးမြှင့်ခြင်း၊ ဒုတိယညွှန်ကြားရေးမှူးချုပ် (ငြိမ်း/ကျွမ်းကျင်) ဒေါက်တာခင်လင်းက လှူဖွယ်ပစ္စည်းများနှင့် အလှူငွေများ ဆက်ကပ်လှူဒါန်းခြင်း၊ အောင်ကံသာ ဓမ္မရိပ်သာအတွက် နဝကမ္မအလှူငွေကျပ်တစ်သိန်းတိတိ လှူဒါန်းခြင်း၊ ဆရာတော်ဦးရေဝတက အနုမောဒနာတရားနှင့် ရေစက်ချတရားတော်များ ဟောကြားချီးမြှင့်ခြင်းတို့ကို ဆောင် ရွက်ခဲ့ကြပြီး နံနက် ၁၁:၃၀ နာရီတွင် “ဗုဒ္ဓသာသနံစိရံတိဋ္ဌတု” သုံးကြိမ်ရွတ်ဆို၍ အခမ်းအနားကို ရုပ်သိမ်းခဲ့ ပါသည်။

အထက်ပါ သံဃာတော်များနှင့်သီလရှင်များအား ဝန်ထမ်းများက နေ့ဆွမ်း ဆက်ကပ် လှူဒါန်းကြပါသည်။ အဆိုပါအခမ်းအနားသို့ ဒုတိယညွှန်ကြားရေးမှူးချုပ်(ငြိမ်း/ကျွမ်းကျင်) ဒေါက်တာခင်လင်းနှင့် အရာ ထမ်း/အမှုထမ်းများ စုံညီစွာတက်ရောက်ခဲ့ကြပြီး ၀န်ထမ်းများအား နေ့လယ်စာဒံပေါက်ဖြင့် ဧည့်ခံကျွေးမွေးခဲ့ ပါသည်။


ဆေးသုမိသားစု အတာသင်္ကြန်နှစ်သစ်ကူးပျော်ပွဲရွှင်ပွဲကျင်းပခြင်း

ဆေးသုတေသနဦးစီးဌာနမိသားစု အတာသင်္ကြန်နှစ်သစ်ကူးပျော်ပွဲရွှင်ပွဲကို ၂၀၁၈ ခုနှစ် ဧပြီ ၁၂ ရက် မွန်းလွဲ ၁:၀၀ နာရီ တွင် ဗဟိုဇီဝဆေးပညာ စာကြည့်တိုက်တိုးချဲ့ဆောင်၌ စည်ကားသိုက်မြိုက်စွာကျင်းပရာ ဆေးသုတေသနဦးစီးဌာန၊ ဒုတိယညွှန်ကြားရေးမှူးချုပ် ဒေါက်တာလှိုင်မြတ်သူအမှူးပြု၍ ညွှန်ကြားရေးမှူး များ၊ ဌာနခွဲမှူးများနှင့် ဝန်ထမ်းများစုံညီစွာ တပျော်တပါး ပါဝင်ဆင်နွှဲခဲ့ကြပါသည်။ အခမ်းအနားမစတင်မီ ရွှေရင်အေးဖြင့်ဧည့်ခံကျွေးမွေးပြီး အရာထမ်း/အမှုထမ်းများ၊ မိသားစုဝင်များက သင်္ကြန်သီချင်းများ၊ ယိမ်းအက များဖြင့် ဖျော်ဖြေတင်ဆက်ကြရာ ကြည့်ရှုအားပေးသူများက လက်ဆောင်ပန်းကုံးများ ချီးမြှင့်ခဲ့ကြပါသည်။ ထို့နောက် ဒုတိယညွှန်ကြားရေးမှူးချုပ်နှင့် ညွှန်ကြားရေးမှူးအဖွဲ့သည် ဝန်ထမ်းများနှင့် အတူတကွပျော်ရွှင်စွာ ရေပက်ကစားခဲ့ကြပြီး “မန်းတောင်ရိပ်ခို” တေးသီချင်းဖြင့် စုပေါင်းသီဆို ကခုန်ကြကာ အခမ်းအနားကို ရုပ်သိမ်း လိုက်ပါသည်။

အလားတူ ဆေးသုတေသနဦးစီးဌာန(ပြင်ဦးလွင်ရုံးခွဲ) မိသားစုများ၏ မြန်မာနှစ်သစ်ကူး ပျော်ပွဲရွှင်ပွဲ အခမ်းအနားကို ၂၀၁၈ ခုနှစ် ဧပြီ ၁၂ ရက် နံနက် ၁၀:၃၀ နာရီတွင် အစည်းအဝေးခန်းမ(၁) ၌ ကျင်းပပြုလုပ်ခဲ့ ပါသည်။

အဆိုပါအခမ်းအနားသို့ ဒုတိယညွှန်ကြားရေးမှူးချုပ်(ငြိမ်း/ကျွမ်းကျင်) ဒေါက်တာခင်လင်းနှင့် ညွှန်ကြားရေးမှူးအဖွဲ့ဝင်များ၊ ဝန်ထမ်းများတက်ရောက်ခဲ့ကြပါသည်။ အခမ်းအနားတွင် အရာထမ်း/အမှုထမ်း ပေါင်း(၁၅)ဦးမှ သင်္ကြန်သီချင်းများဖြင့်လည်းကောင်း၊ ဝန်ထမ်း အမျိုးသမီးငယ်များ နှင့် ဝန်ထမ်းမိသားစု၏ မျိုးဆက်သစ် သားငယ်/သမီးငယ်များက အကအလှများဖြင့် ဖျော်ဖြေခဲ့ကြပါသည်။ အခမ်းအနားကို နေ့လယ် ၁၂:၀၀ နာရီတွင် “မန်းတောင်ရိပ်ခို” သီချင်းဖြင့် ပျော်ရွှင်စွာသံပြိုင်သီဆို၍ ပြီးဆုံးခဲ့ပါသည်။ အခမ်းအနား အပြီးတွင် ဝန်ထမ်းအားလုံးအား မုန့်လုံးရေပေါ်ဖြင့် တည်ခင်းဧည့်ခံခဲ့ပြီးနောက် ဝန်ထမ်းမိသားစုများ ပျော်ရွှင်စွာ နှုတ်ဆက် ရေကစားခဲ့ကြပါသည်။


အန္တရာယ်ကင်းပရိတ်တရားတော်များရွတ်ဖတ်ပူဇော်ပွဲကျင်းပခြင်း

၂၀၁၈ ခုနှစ် ဧပြီ ၁၇ ရက် မြန်မာနှစ်ဆန်း ၁ ရက်(အင်္ဂါနေ့) ညနေ ၄:၀၀ နာရီတွင် ဆေးသုတေသနဦးစီး ဌာန ဗဟိုဇီဝဆေးပညာစာကြည့်တိုက်အစည်းအဝေးခန်းမ၌ အန္တရာယ်ကင်း ပရိတ်တရားတော်များ ရွတ်ဖတ် ပူဇော်ပွဲကျင်းပခဲ့ရာ ရန်ကုန်မြို့ အိမ်တော်ရာ ဒဂုံပရိယတ္တိစာသင်တိုက်၊ ဆရာတော် ဘဒ္ဒန္တသြဘာသ အမှူးပြုသောပင့်သံဃာ (၅)ပါး ကြွရောက်တော်မူကြပြီး ဆေးသုတေသနဦးစီးဌာန ဒုတိယညွှန်ကြားရေးမှူးချုပ် (သုတေသန) ဒေါက်တာလှိုင်မြတ်သူ၊ ဒုတိယညွှန်ကြားရေးမှူးချုပ် (သုတေသန) ဒေါက်တာခင်စောအေး၊ ဒုတိ ယညွှန်ကြားရေးမှူးချုပ် (စီမံ/ဘဏ္ဍာ) ဒေါက်တာဇော်မြင့်နှင့် ညွှန်ကြားရေးမှူးများ၊ ဒုတိယညွှန်ကြားရေးမှူး/ ဌာနခွဲမှူးများ တက်ရောက်၍ ဆရာတော်သံဃာတော်များထံမှ ငါးပါးသီလခံယူ ဆောက်တည်ကာ အန္တရာယ် ကင်း ပရိတ်တရားတော်များကို နာယူကြပါသည်။ ထို့နောက် ဆရာတော်သံဃာတော်များအား နဝကမ္မအလှူငွေ နှင့် လှူဖွယ်ဝတ္ထုအစုစုတို့ကို ကပ်လှူကြပြီး ရေစက်သွန်းချ အမျှပေးဝေကာ အခမ်းအနားကို ရုပ်သိမ်းလိုက်ပါ သည်။

အလားတူ ဆေးသုတေသနဦးစီးဌာန(ပြင်ဦးလွင်ရုံးခွဲ)၏ မြန်မာနှစ်သစ်ကူး အန္တရာယ်ကင်း ပရိတ် တရားတော်နာ အခမ်းအနားကို ၂၀၁၈ ခုနှစ် ဧပြီ ၁၇ ရက် နေ့လယ် ၁၂:၀၀ နာရီတွင် ဆေးသုတေသနဦးစီးဌာန (ပြင်ဦးလွင်ရုံးခွဲ) စီမံခန့်ခွဲရေးဌာနခွဲ၌ ပြုလုပ်ခဲ့ပါသည်။

အခမ်းအနားသို့ ဒိုးပင်ပရဟိတကျောင်းမှ သံဃာတော် (၅)ပါး ကြွရောက် ချီးမြှင့်ခဲ့ပါသည်။ ရှေးဦးစွာ ဝန်ထမ်းမိသားစုများက ဘုရားအမှူးရှိသောရတနာသုံးပါးအား ရှိခိုးကန်တော့ပြီး ငါးပါးသီလခံယူ ဆောက်တည်ခဲ့ကြပါသည်။ ထို့နောက် သံဃာတော်များက အန္တရာယ်ကင်းပရိတ်တရားတော်များ ရွတ်ဖတ်ချီးမြှင့် ပေးကြပါသည်။ ဆက်လက်၍ ဒုတိယညွှန်ကြားရေးမှူးချုပ်(ငြိမ်း/ကျွမ်းကျင်) ဒေါက်တာခင်လင်းနှင့် ဝန်ထမ်း မိသားစုများက လှူဖွယ်ပစ္စည်းများနှင့် နဝကမ္မအလှူငွေများကို ဆက်ကပ်လှူဒါန်းခဲ့ကြပြီး ဆရာတော်ဦးရာဇိန္ဒ က ရေစက်ချအနုမောဒနာတရားဟောကြား၍ အခမ်းအနားကို မွန်းလွဲ ၁၂:၅၀ နာရီတွင် အောင်မြင်စွာရုပ်သိမ်း ခဲ့ပါသည်။ အဆိုပါအခမ်းအနားသို့ အရာထမ်း/အမှုထမ်း စုစုပေါင်း (၅၀)ဦးခန့် တက်ရောက်ခဲ့ကြပြီး အခမ်း အနားအပြီးတွင် တရားနာပရိတ်သတ်များအား အချိုရည်ဖြင့် တည်ခင်းဧည့်ခံခဲ့ပါသည်။


မြန်မာနိုင်ငံသူနာပြုနှင့် သားဖွားအသင်း(ဗဟို)မှ ကြီးမှူးကျင်းပသော Quality Improvement Seminar နှင့် အလုပ်ရုံဆွေးနွေးပွဲကျင်းပခြင်း

၂၀၁၈ ခုနှစ် ဧပြီ ၂၁ ရက် နံနက် ၉:၃၀ နာရီတွင် မြန်မာနိုင်ငံသူနာပြုနှင့် သားဖွားအသင်း(ဗဟို)မှ ကြီးမှူး၍ Hospitechno Co., Ltd, နှင့် ရွှေဇနက အများပိုင်ကုမ္ပဏီလီမီတက်တို့ပူးပေါင်းစီစဉ်ကျင်းပသော Quality Improvement Seminar နှင့် အလုပ်ရုံဆွေးနွေးပွဲ ဖွင့်ပွဲအခမ်းအနားကို ဆေးသုတေသနဦးစီးဌာန အဆင့်မြင့် မော်လီကျူးသုတေသနဌာန အစည်းအဝေးခန်းမ(၂)၌ ကျင်းပပြုလုပ်ခဲ့ပါသည်။ ရှေးဦးစွာ မြန်မာနိုင်ငံ သူနာပြုနှင့် သားဖွားအသင်း(ဗဟို)မှ ဥက္ကဋ္ဌ ပါမောက္ခဒေါ်ရင်မြက အဖွင့်အမှာစကားပြောကြားပြီး ရွှေဇနက အများပိုင် ကုမ္ပဏီလီမီတက်မှ ဥက္ကဋ္ဌ ဒေါက်တာကျော်မြင့်နိုင်က အမှာစကားပြောကြားပါသည်။ ထို့နောက် အခမ်းအနား တက်ရောက်သူများ စုပေါင်းအမှတ်တရ ဓာတ်ပုံရိုက်ကူးခဲ့ကြပါသည်။ အဆိုပါ အခမ်းအနားသို့ မြန်မာနိုင်ငံသူနာပြုနှင့်သားဖွားအသင်း(ဗဟို) ဥက္ကဋ္ဌ ပါမောက္ခဒေါ်ရင်မြနှင့် အလုပ်အမှုဆောင် အဖွဲ့ဝင်များ၊ ကျန်းမာရေးနှင့်အားကစားဝန်ကြီးဌာန ကုသရေးဦးစီးဌာန ရန်ကုန်တိုင်းဒေသကြီးရှိ ဆေးရုံကြီးများမှ သူနာပြု အုပ်နှင့် သူနာပြုဆရာမများ၊ ပုဂ္ဂလိကဆေးရုံဆေးခန်းများမှ သူနာပြုအုပ်နှင့် သူနာပြုဆရာမများ၊ သူနာပြု တက္ကသိုလ်(ရန်ကုန်)နှင့် ရန်ကုန်တိုင်းဒေသကြီး ပြည်သူ့ကျန်းမာရေးဦးစီးဌာနတို့မှ တာဝန်ရှိသူများ၊ Hospitechno Co., Ltd, မှ ဒေါ်သင်းနွယ်စိုးနှင့် ဝန်ထမ်းများ၊ ရွှေဇနကအများပိုင်ကုမ္ပဏီလီမီတက်မှ ဥက္ကဋ္ဌ ဒေါက်တာကျော်မြင့်နိုင်နှင့် တာဝန်ရှိသူများ၊ စုစုပေါင်း (၁၅၀)ဦးခန့်တက်ရောက်ခဲ့ကြပါသည်။

အခမ်းအနားကို ဆက်လက်ကျင်းပရာ United Pharmaceutical Co., Ltd, မှ Brand Manager ဒေါက်တာထွဋ်အင်ကြင်းက ကုမ္ပဏီမှတင်သွင်းဖြန့်ချိသော ဆေးဝါးများနှင့် ကျန်းမာရေးဆိုင်ရာ ကုန်ပစ္စည်းများ အကြောင်း မိတ်ဆက်ရှင်းလင်းတင်ပြပါသည်။ ထို့နောက် Hospitechno Co., Ltd, မှ ဒေါ်သင်းနွယ်စိုးက “How to start Quality Improvement Project in the respective healthcare sector and the strategies for continuous quality improvement” ခေါင်းစဉ်ဖြင့်လည်းကောင်း၊ ဒေါက်တာအဲရစ်အာကာ မော်ဝေက“Quality Improvement Projects learning Journey” ခေါင်းစဉ်ဖြင့်လည်းကောင်း Healthcare Quality Improvement အကြောင်းကို စိတ်ဝင်စားဖွယ်ဖြစ်အောင် ရှင်းလင်းတင်ပြခဲ့ကြပါသည်။ ထို့နောက် "Making it Meaningful: Finding Quality Improvement Projects Worthy of your Time, Effort and Expertise" ခေါင်းစဉ်ဖြင့် ဆွေးနွေးပွဲကိုကျင်းပရာ မြန်မာနိုင်ငံသူနာပြုနှင့်သားဖွားအသင်း(ဗဟို) ဥက္ကဋ္ဌ ပါမောက္ခဒေါ်ရင်မြ၊ Hospitechno Co., Ltd, မှ ဒေါ်သင်းနွယ်စိုးနှင့် ဒေါက်တာအဲရစ်အာကာမော်ဝေ၊ ရန်ကုန်ပြည်သူ့ဆေးရုံကြီးမှ သူနာပြုဆရာမကြီးဒေါ်ခင်ခင်မြင့်၊ SSC ဆေးရုံကြီးမှ သူနာပြုဆရာမကြီး ဒေါ်ယဉ်ယဉ်တို့က တက်ရောက်လာသူများနှင့်အတူ ဝိုင်းဝန်းဆွေးနွေး အကြံပြုခဲ့ကြပါသည်။ ဆက်လက်၍ ဆွေးနွေးပွဲ တက်ရောက်လာသူများအား မြန်မာနိုင်ငံ သူနာပြုနှင့် သားဖွားအသင်း(ဗဟို)မှ ဥက္ကဋ္ဌ ပါမောက္ခ ဒေါ်ရင်မြနှင့် အလုပ်အမှုဆောင်အဖွဲ့က ဂုဏ်ပြုလက်မှတ်များ အသီးသီးချီးမြှင့်ပြီး ဆွေးနွေးပွဲကို မွန်းလွဲ ၂:၀၀ နာရီတွင် ရုပ်သိမ်းလိုက်ပါသည်။

ထို့နောက် ဆွေးနွေးပွဲ တက်ရောက်လာသူများထဲမှ (၃၀) ဦးအားရွေးချယ်၍ Quality Improvement Workshop (Effective communication and documentation-Handover) ကို စုပေါင်းဝိုင်းဖွဲ့၍ ဆက် လက်ကျင်းပပြုလုပ်ခဲ့ပါသည်။


ဆေးပညာမဟာသိပ္ပံ(ရောဂါဗေဒ) ဘွဲ့လွန်ပထမနှစ်သင်တန်းသားများအား အဆင့်မြင့်ရောဂါရှာဖွေရေး ဓာတ်ခွဲခန်းနည်းပညာများကိုစာတွေ့လက်တွေ့သင်ကြားပို့ချမှုသင်တန်းဖွင့်လှစ်ခြင်း

၂၀၁၈ ခုနှစ် ဧပြီ ၂၃ ရက် နံနက် ၉:၃၀ နာရီတွင် ဆေးပညာမဟာသိပ္ပံ(ရောဂါဗေဒ) ဘွဲ့လွန်ပထမနှစ် သင်တန်းသား/သူများအား အဆင့်မြင့်မော်လီကျူးနည်းပညာနှင့်သက်ဆိုင်သည့် ရောဂါဗေဒဘာသာရပ်များကို စာတွေ့လက်တွေ့ သင်ကြားပို့ချမှု သင်တန်းဖွင့်လှစ်ခြင်းအခမ်းအနားကို ဆေးသုတေသနဦးစီးဌာန လူမှုဆေး ပညာသုတေသန အစည်းအဝေးခန်းမ၌ကျင်းပရာ ညွှန်ကြားရေးမှူး(သုတေသန) ဒေါက်တာမို့မို့ထွန်းတက် ရောက်၍ အမှာစကားပြောကြားပြီး ဆေးသုတေသနဦးစီးဌာန၏ ဖွဲ့စည်းပုံနှင့် ဆောင်ရွက်လျက်ရှိသော သုတေသနလုပ်ငန်း နယ်ပယ်များအကြောင်းကို ရှင်းလင်းပြောကြားပါသည်။

ဆက်လက်၍ ညွှန်ကြားရေးမှူး(သုတေသန) ဒေါက်တာမို့မို့ထွန်းက “Recombinant DNA Technology and Molecular Cloning”၊ ညွှန်ကြားရေးမှူး(သုတေသန) ဒေါက်တာဝင်းပပနိုင်က “Application of Flow Cytometry: Leukemia/Lymphoma၊ Cytogenetics in Haematological Malignancy”၊ အရည်အသွေးထိန်းသိမ်းရေးဌာနခွဲမှ ဒုတိယညွှန်ကြားရေးမှူး/ ဌာနခွဲမှူး ဒေါက်တာယဉ်မင်း ထွန်းက “Principles and Practices of Immunohistochemistry (IHC)”၊ သွေးအစီအစဉ်ဌာနခွဲမှ ဒုတိယညွှန်ကြားရေးမှူး/ ဌာနခွဲမှူး ဒေါက်တာဇင်ဇင်သူက “HLA Typing”၊ သုတေသနမှူး ဒေါက်တာ မင်းမင်းဝင်း က “Electron Microscope”၊ သွေးသုတေသနဌာနခွဲမှ ဒုတိယညွှန်ကြားရေးမှူး/ဌာနခွဲမှူး ဒေါက်တာစန်းစန်းထွေးက “Serum Protein Electrophoresis”၊ နည်းပညာဖွံ့ဖြိုးရေးဌာနခွဲမှ ဒုတိယ ညွှန်ကြားရေးမှူး/ဌာနခွဲမှူး ဒေါက်တာမူမူရွှေက “Some Studies on Molecular Detection of Oncogenic Human Papillomavirus (HPV) Genotypes Using Different Technologies”၊ စမ်းသပ်ဆေးပညာ သုတေသနဌာနခွဲမှ ဒုတိယညွှန်ကြားရေးမှူး/ဌာနခွဲမှူး ဒေါက်တာအေးအေးဝင်းက “Polymerase Chain Reaction (PCR) & Real Time PCR” တို့ကို အသီးသီး သင်ကြားပို့ချခဲ့ကြပါသည်။

ထို့အပြင် အဆိုပါဘွဲ့လွန်သင်တန်းသားများအား ရောဂါဗေဒသုတေသနဌာနခွဲ၊ ရောဂါပြီးဗေဒသုတေသန ဌာနခွဲ၊ သွေးရောဂါ သုတေသနဌာနခွဲနှင့် သွေးအစီအစဉ်ဌာနခွဲများသို့ လှည့်လည်၍ ရောဂါဗေဒဆိုင်ရာ အဆင့်မြင့်နည်းပညာများကို လက်တွေ့ သင်ကြားပေးခြင်းများ ပြုလုပ်ခဲ့ပါသည်။ ယခုဖွင့်လှစ်ပို့ချသောသင်တန်း သို့ ဆေးတက္ကသိုလ်(၁)ရန်ကုန်၊ ဆေးတက္ကသိုလ်(၂)ရန်ကုန်၊ ဆေးတက္ကသိုလ်(မန္တလေး)၊ ဆေးတက္ကသိုလ် (မကွေး)နှင့် တပ်မတော်ဆေးတက္ကသိုလ်တို့မှ ဆေးပညာမဟာသိပ္ပံ(ရောဂါဗေဒ) ဘွဲ့လွန် ပထမနှစ်သင်တန်း သား/သူ (၅၈) ဦးတို့ တက်ရောက်ကြပြီး သင်တန်းကာလမှာ (၅) ရက် ကြာမြင့်ခဲ့ပါသည်။


“2018 Facility Assessment for Reproductive Health Commodities and Services Coordination Meeting”ဖွင့်ပွဲအခမ်းအနားကျင်းပပြုလုပ်ခြင်း

၂၂၀၁၈ ခုနှစ် ဧပြီ ၂၃ ရက် နံနက် ၉:၀၀ နာရီတွင် “2018 Facility Assessment for Reproductive Health Commodities and Services Coordination Meeting” ဖွင့်ပွဲအခမ်းအနားကို ဆေးသုတေသနဦးစီး ဌာန (ပြင်ဦးလွင်ရုံးခွဲ) အစည်းအဝေးခန်းမ(၁)၌ ကျင်းပပြုလုပ်ခဲ့ပါသည်။

အခမ်းအနားကို ဆေးသုတေသနဦးစီးဌာန ညွှန်ကြားရေးမှူးချုပ် ဒေါက်တာကျော်ဇင်သန့်က အဖွင့်အ မှာစကားပြောကြား၍ ဖွင့်လှစ်ပေးခဲ့ပြီး စုပေါင်းမှတ်တမ်းတင်ဓာတ်ပုံများ ရိုက်ကူးခဲ့ကြပါသည်။ အဆိုပါ အစည်း အဝေးသို့ ညွှန်ကြားရေးမှူးချုပ် ဒေါက်တာကျော်ဇင်သန့်နှင့် ဒုတိယညွှန်ကြားရေးမှူးချုပ်(သုတေသန) ဒေါက်တာခင်စောအေး ဦးဆောင်သော ဆေးသုတေသန ဦးစီးဌာနမှ ညွှန်ကြားရေးမှူးအဖွဲ့ဝင်များ၊ UNFPA မှ Programme Specialist(RHCS) ဒေါက်တာအောင်သူထွန်း၊ ပြည်နယ်နှင့်တိုင်းဒေသကြီးအသီးသီးမှ ဖိတ်ကြားထားသော အထူးဧည့်သည်တော်များနှင့် သင်တန်းသား/သူများ စုစုပေါင်း (၆၀)ဦး တက်ရောက်ခဲ့ကြ ပါသည်။ အဆိုပါအစည်းအဝေးတွင် တက်ရောက်လာသူများက Reproductive Health Commodities and Services နှင့် ပတ်သက်၍ ဝိုင်းဝန်းဆွေးနွေးတင်ပြခဲ့ကြပြီး အစည်းအဝေးကို ညနေ ၄:၃၀ နာရီတွင် ရုပ်သိမ်းခဲ့ ပါသည်။


“2018 Facility Assessment for Reproductive Health Commodities and Services Interviewer Training” ကျင်းပပြုလုပ်ခြင်း

၂၀၁၈ ခုနှစ် ဧပြီ ၂၄ ရက် နံနက် ၉:၀၀ နာရီတွင် ကျန်းမာရေးနှင့်အားကစားဝန်ကြီးဌာနနှင့် UNFPA တို့ ပူးပေါင်းစီစဉ်သော “2018 Facility Assessment for Reproductive Health Commodities and Services Interviewer Training” အခမ်းအနားကို ဆေးသုတေသန ဦးစီးဌာန (ပြင်ဦးလွင်ရုံးခွဲ) အစည်းအဝေး ခန်းမ(၁)၌ ကျင်းပပြုလုပ်ခဲ့ပါသည်။ အခမ်းအနားတွင် ဒုတိယညွှန်ကြားရေးမှူးချုပ်(သုတေသန) ဒေါက်တာ ခင်စောအေးက အဖွင့်အမှာစကားပြောကြားပြီး သင်တန်းတက်ရောက် လာသူများနှင့် အမှတ်တရစုပေါင်း ဓာတ်ပုံ ရိုက်ကူးခဲ့ပါသည်။ အဆိုပါအခမ်းအနားသို့ ဆေးသုတေသနဦးစီးဌာန (ပြင်ဦးလွင်ရုံးခွဲ)မှ ဒုတိယညွှန်ကြားရေး မှူးချုပ်(သုတေသန) ဒေါက်တာခင်စောအေး၊ ဒုတိယညွှန်ကြားရေးမှူးချုပ် (ငြိမ်း/ကျွမ်းကျင်) ဒေါက်တာခင်လင်း နှင့် ညွှန်ကြားရေးမှူးများ၊ UNFPA မှ Programme Specialist(RHCS) ဒေါက်တာအောင်သူထွန်း၊ ဆေးသုတေသနဦးစီးဌာန (ပြင်ဦးလွင်ရုံးခွဲ)နှင့် ပြည်နယ်နှင့် တိုင်းဒေသအသီးသီးတို့မှ သင်တန်းသား/သူများ တက်ရောက်ခဲ့ကြပါသည်။ ရှေးဦးစွာ ဆေးသုတေသနဦးစီးဌာန(ပြင်ဦးလွင်ရုံးခွဲ)မှ ညွှန်ကြားရေးမှူး ဒေါက်တာမိုးကျော်မြင့်က Introduction and Methodology of the Study၊ သုတေသနမှူး ဒေါက်တာမဉ္ဇူတင်အောင်က How to Conduct Face-to-Face Interview တို့ကို ရှင်းလင်းတင်ပြကြပြီး၊ သုတေသနအရာရှိ ဒေါက်တာကျော်သူစိုးက Health Facility Assessment၊ သုတေသနအရာရှိ ဒေါက်တာ ရတနာအောင်က Client Interview တို့ကို တက်ရောက်လာသူများအား အမေးအဖြေ ပြုလုပ်ခဲ့ကြပါသည်။ ဆက်လက်၍ ဒေါက်တာမိုးကျော်မြင့်က Brief on Drawing a Tour Plan and Administrative Procedure ကိုရှင်းလင်းပြသပြီး သင်တန်းသား/သူများအား ကွင်းဆင်းသုတေသန အချက်အလက်ကောက်ခံရာတွင် တွေ့ကြုံရမည့် အခက်အခဲများကို ဝိုင်းဝန်းဆွေးနွေးစေပါသည်။ ထို့နောက် သုတေသနအရာရှိ ဒေါက်တာ ကျော်ကိုကိုထက်က Sampling for Client Interviews များကို ရှင်းလင်းတင်ပြပြီး တက်ရောက်လာသူများနှင့် စုပေါင်းဝိုင်းဖွဲ့၍ ဆွေးနွေးမေးမြန်းညှိနှိုင်းကြပြီး သင်တန်းကို ညနေ ၄:၃၀ နာရီတွင် ရုပ်သိမ်းလိုက်ပါသည်။ အဆိုပါ သင်တန်းကို ဧပြီ ၂၄ ရက်နှင့် ၂၅ရက် (၂) ရက်တိုင်ကျင်းပခဲ့ပြီး ဆေးသုတေသနဦးစီးဌာန (ပြင်ဦးလွင်ရုံးခွဲ)နှင့် ပြည်နယ်နှင့်တိုင်းဒေသ အသီးသီးတို့မှ သင်တန်းသား/သူများ(၅၉)ဦး တက်ရောက်ခဲ့ကြပါသည်။


ကိုရီးယားသမ္မတနိုင်ငံ KOFIH မှ President Dr.Yohan IHN(John A. Linton) နှင့် အဖွဲ့အားလက်ခံတွေ့ဆုံခြင်း

၂၀၁၈ ခုနှစ် ဧပြီ ၂၄ ရက် နံနက် ၁၁:၀၀ နာရီတွင် ဆေးသုတေသနဦးစီးဌာန ဒုတိယညွှန်ကြားရေးမှူး ချုပ်(သုတေသန) ဒေါက်တာလှိုင်မြတ်သူသည် ကိုရီးယားသမ္မတနိုင်ငံ KOFIH မှ President Dr. Yohan IHN (John A. Linton) နှင့် အဖွဲ့အား ဇီဝဆေးပညာသုတေသန အစည်းအဝေးခန်းမ၌ လက်ခံတွေ့ဆုံခဲ့ပါသည်။ ထိုသို့တွေ့ဆုံရာတွင် ဒုတိယညွှန်ကြားရေးမှူးချုပ် (သုတေသန) ဒေါက်တာလှိုင်မြတ်သူနှင့်အတူ ညွှန်ကြားရေး မှူး(ငြိမ်း/ကျွမ်းကျင်) ဒေါက်တာခင်သက်ဝေနှင့် ညွှန်ကြားရေးမှူးများ၊ သက်ဆိုင်ရာသုတေသီများ၊ KOFIH Myanmar Office မှ ဌာနေကိုယ်စားလှယ် Health Advisor Ms. Pauline Yongeun Ahn တို့ တက်ရောက် ခဲ့ကြပြီး Dr. LEE Jong-wook memorial fund ပညာတော်သင်ကိစ္စ၊ လှည်းကူးမြို့နယ်တွင် ပူးပေါင်းဆောင် ရွက်လျက်ရှိသည့် Implementation Research တို့နှင့်ပတ်သက်ပြီး ညွှန်ကြားရေးမှူး(ငြိမ်း/ကျွမ်းကျင်) ဒေါက်တာခင်သက်ဝေနှင့် သုတေသီများက လိုအပ်သည်များကို မေးမြန်းဆွေးနွေးခဲ့ကြပါသည်။


“လူထုအခြေပြုကင်ဆာရောဂါမှတ်ပုံတင်ခြင်းရှေ့ပြေးသုတေသနစီမံချက်” အသိပေးရှင်းလင်းခြင်းနှင့် အခြေခံကျန်းမာရေးဝန်ထမ်းများအားသင်တန်းပေးခြင်း အခမ်းအနားကျင်းပခြင်း

၂၀၁၈ ခုနှစ် ဧပြီ ၂၇ ရက် နံနက် ၉:၃၀ နာရီတွင် ကျန်းမာရေးနှင့် အားကစားဝန်ကြီးဌာနလက်အောက် ရှိ ဆေးသုတေသနဦးစီးဌာန၊ ပဲခူးတိုင်းဒေသကြီး ကဝမြို့နယ် ပြည်သူ့ကျန်းမာရေးဦးစီးဌာနနှင့် ကုသရေးဦးစီး ဌာနတို့ ပူးပေါင်းဆောင်ရွက်သော “လူထုအခြေပြု ကင်ဆာရောဂါ မှတ်ပုံတင်ခြင်း ရှေ့ပြေးသုတေသနစီမံချက်” အသိပေးရှင်းလင်းခြင်းနှင့် အခြေခံကျန်းမာရေးဝန်ထမ်းများအား သင်တန်းပေးခြင်း အခမ်းအနားကို ကဝမြို့နယ် ပြည်သူ့ဆေးရုံ၌ ကျင်းပပြုလုပ်ခဲ့ပါသည်။ ရှေးဦးစွာ ဆေးသုတေသနဦးစီးဌာန ညွှန်ကြားရေးမှူးချုပ် ဒေါက်တာကျော်ဇင်သန့်က နှုတ်ခွန်းဆက်အမှာစကားပြောကြားပြီး၊ ပဲခူးတိုင်းဒေသကြီး တိုင်းကုသရေးဦးစီး ဌာနမှူး ဒေါက်တာအေးငြိမ်းက အဖွင့်အမှာစကား ပြောကြားပါသည်။ ဆက်လက်၍ ပဲခူးပြည်သူ့ဆေးရုံကြီးမှ ဆေးရုံအုပ်ကြီး ဒေါက်တာရန်နိုင်မောင်က အမှာစကားပြောကြားပါသည်။ ထို့နောက် ဖွင့်ပွဲအခမ်းအနား ပြီး ဆုံးကြောင်းကြေညာပြီး ညွှန်ကြားရေးမှူးချုပ် ဒေါက်တာကျော်ဇင်သန့်နှင့် တက်ရောက်လာသူများ စုပေါင်း၍ အမှတ်တရ ဓာတ်ပုံ ရိုက်ကူးခဲ့ကြပါသည်။ အဆိုပါအခမ်းအနားသို့ ညွှန်ကြားရေးမှူးချုပ် ဒေါက်တာကျော်ဇင်သန့်၊ ဒုတိယညွှန်ကြားရေးမှူးချုပ် (သုတေသန) ဒေါက်တာခင်စောအေး၊ သက်ဆိုင်ရာ ဒုတိယညွှန်ကြားရေးမှူး/ ဌာနခွဲမှူးနှင့် သုတေသီပညာရှင်များ၊ ကုတင်(၁၀၀၀) ဆေးရုံကြီး (နေပြည်တော်)မှ ကင်ဆာအထူးကုဆရာ ဝန်ကြီးများ ဖြစ်ကြသည့် ဒေါက်တာကောင်းမြတ်ရွှေနှင့် ဒေါက်တာစိုးမြတ်ဝင်း၊ ပဲခူးတိုင်းဒေသကြီး တိုင်းကု သရေးဦးစီးဌာမှူး ဒေါက်တာအေးငြိမ်း၊ ပဲခူးပြည်သူ့ဆေးရုံကြီးမှဆေးရုံအုပ်ကြီး ဒေါက်တာရန်နိုင်မောင်နှင့် ကင်ဆာရောဂါအထူးကုဆရာဝန် ဒေါက်တာစောယုဝင်း၊ လွှတ်တော်ကိုယ်စားလှယ်ဦးလှသန်း၊ ကဝမြို့နယ် ပြည်သူ့ဆေးရုံမှ မြို့နယ်ဆရာဝန်ကြီး ဒေါက်တာမောင်မောင်ချစ်၊ သူနာပြုနှင့်သားဖွား ဆရာမများ၊ ကျန်းမာရေး မှူးများ၊ ကျန်းမာရေးဝန်ထမ်းများ၊ ဆေးရုံအထောက်အကူပြုကော်မတီဝင်များ၊ မြို့နယ်ဌာနဆိုင်ရာ တာဝန်ရှိ ပုဂ္ဂိုလ်များ၊ မိခင်နှင့်ကလေးစောင့်ရှောက်ရေးအဖွဲ့ဝင်များ စုစုပေါင်း (၁၅၀) ဦး တို့တက်ရောက်ခဲ့ကြပါသည်။

ထို့နောက် အခြေခံကျန်းမာရေးဝန်ထမ်းများအား သင်တန်းပေးခြင်း အခမ်းအနားကို ဆက်လက်ကျင်းပရာ ဒုတိယညွှန်ကြားရေးမှူးချုပ် (သုတေသန) ဒေါက်တာခင်စောအေးက သုတေသနစီမံချက်နှင့် ပတ်သက်၍ အသိပေး ရှင်းလင်းပြောကြားပါသည်။ ဆက်လက်၍ ဒေါက်တာစောယုဝင်းက လက်ရှိပဲခူးတိုင်းအတွင်း ကင်ဆာရောဂါဖြစ်ပွားမှုနှုန်းနှင့် ကုသမှုနည်းလမ်းများကို လည်းကောင်း၊ ဒေါက်တာကောင်းမြတ်ရွှေနှင့် ဒေါက်တာစိုးမြတ်ဝင်းတို့က ကင်ဆာရောဂါအရင်းအမြစ် ဖြစ်ပွားရာနေရာနှင့် အသွင်အပြင် လက္ခဏာများ အကြောင်း ကိုလည်းကောင်း ရှင်းလင်းပြောကြားခဲ့ကြပါသည်။ ထို့နောက် ဆေးသုတေသနဦးစီးဌာနမှ သုတေသနအရာရှိ ဒေါက်တာသန္တာလင်းက ကင်ဆာရောဂါ မှတ်ပုံတင်စာရင်းသွင်း မိုဘိုင်းဖုန်းဆော့ဝဲ ထည့်သွင်းပုံနှင့် အသုံးပြုပုံကို ရှင်းလင်းပြသပြီး၊ ကျန်သုတေသီအဖွဲ့ဝင်များက ကင်ဆာရောဂါ မှတ်ပုံတင်စာရင်းသွင်း မိုဘိုင်းဖုန်းဆော့ဝဲကို အသုံးပြုကြမည့် ကျန်းမာရေးဝန်ထမ်းများ၏ ဖုန်းများအတွင်းသို့ ထည့်သွင်း ပေးခြင်း၊ မိုဘိုင်းဖုန်းဆော့ဝဲကို အသုံးပြု၍ ကင်ဆာရောဂါ မှတ်ပုံတင်စာရင်းသွင်းခြင်းအား အုပ်စုဖွဲ့၍ လက်တွေ့လုပ်ဆောင်စေခြင်း၊ ဒုတိယညွှန်ကြားရေးမှူး ဒေါက်တာယဉ်သက်နုဦးက ကင်ဆာရောဂါ မှတ်ပုံတင် စာရင်းသွင်းသည့် အချက်အလက်များ အရည်အသွေးပြည့်မီကောင်းမွန်စွာ ထိန်းသိမ်းရေးအတွက် ရှေ့ဆက်လက် ပြုလုပ်သွားမည့် စောင့်ကြည့်လေ့လာဆန်းစစ်မှုများအကြောင်းကို ရှင်းလင်းအသိပေး ပြောကြားခဲ့ပါသည်။ ထို့နောက် ကဝမြို့နယ်ပြည်သူ့ဆေးရုံမှ မြို့နယ်ဆရာဝန်ကြီး ဒေါက်တာမောင်မောင်ချစ်က နိဂုံးချုပ်အမှာစကား ပြောကြားကာ သင်တန်းပေးခြင်းကို ညနေ ၅:၀၀ နာရီတွင်ရုပ်သိမ်းလိုက်ပါသည်။


ဌာနတွင်းပညာရပ်ဆိုင်ရာဟောပြောပွဲ ကျင်းပပြုလုပ်ခြင်း

သုတေသနစွမ်းအားမြှင့်တင်ခြင်း(Research Capacity Strengthening) နှင့် ဗဟုသုတမျှဝေခြင်းအစီ အစဉ် (Knowledge Sharing Program) အရ ပညာရပ်ဆိုင်ရာဟောပြောပွဲ အခမ်းအနားကို ဆေးသုတေသန ဦးစီးဌာန (ပြင်ဦးလွင်ရုံးခွဲ) အစည်းအဝေးခန်းမ(၁)တွင် ၂၀၁၈ ခုနှစ် ဧပြီ ၃၀ ရက် မွန်းလွဲ ၁:၀၀ နာရီ၌ ကျင်းပ ပြုလုပ်ခဲ့ပါသည်။ အထက်ပါအခမ်းအနားတွင် ဓါတ်ခွဲခန်းတိရစ္ဆာန်မွေးမြူရေးဌာနခွဲမှ ဒုတိယညွှန်ကြားရေးမှူး /ဌာနခွဲမှူး ဒေါ်စန္ဒာလင်းက သဘာပတိအဖြစ်လည်းကောင်း၊ စီမံခန့်ခွဲရေးဌာနခွဲမှ အငယ်တန်းလက်ရေးတို လက်နှိပ်စက် ဒေါ်သင်းသင်းလဲ့က အခမ်းအနားမှူးအဖြစ် လည်းကောင်း အသီးသီး ဆောင်ရွက်ခဲ့ကြပါသည်။

အဆိုပါဟောပြောပွဲတွင် ဆေးသုတေသနဦးစီးဌာန (ပြင်ဦးလွင်ရုံးခွဲ) ဆေးဝါးဗေဒသုတေသန ဌာနခွဲမှ ဒုတိယညွှန်ကြားရေးမှူး/ဌာနခွဲမှူး ဒေါ်ခင်မေသီက “အဆုတ်ကင်ဆာ အကြောင်းသိကောင်းစရာ” ခေါင်းစဉ်ဖြင့် လည်းကောင်း၊ ဘက်တီးရီးယားဗေဒသုတေသနဌာနခွဲမှ သုတေသနလက်ထောက်(၂) ဒေါ်ချောစုက “Diphtheria” ခေါင်းစဉ်ဖြင့် လည်းကောင်း တင်ပြခဲ့ကြပါသည်။ တက်ရောက်လာသူ ဝန်ထမ်းများက သိလိုသည် များကို စိတ်ဝင်စားစွာ မေးမြန်းခဲ့ကြပြီး ဖြည့်စွက်အကြံပြု ဆွေးနွေးခဲ့ကြပါသည်။ အထက်ပါ ဟောပြောပွဲသို့ ဒုတိယညွှန်ကြားရေးမှူးချုပ် (ငြိမ်း/ကျွမ်းကျင်) ဒေါက်တာခင်လင်းနှင့် ညွှန်ကြားရေးမှူးအဖွဲ့ဝင်များ အပါအဝင် ဝန်ထမ်း(၅၄)ဦး တက်ရောက်ခဲ့ကြပါသည်။